UN ESPACIU INCLUSIVU LGTBI+ ABIERTU A TOLES PERSONES

OXETIVOS

Faciendo Camín empezó en pequeñu, como un pequenu grupu de coleguis que salíamos los domingos al monte. Agora somos más, pero esa filosofía primera caltiense.

Esti grupu ye una conquista: primero porque tamos ocupando espaciu, visibilizándonos, poniendo les nueses riegles y rompiendo silencios; y segundu porque lo tamos faciendo al traviés del deporte, esto ye: nun tando quietes y prestándonos en contactu cola naturaleza, les unes coles otres.

La nuesa intención ye crear espacios yá non solo de respetu y llibres de violencies, si non, y más importante, de celebración, porque nun pidimos permisu a naide pa ser, pa tar y p’esfrutar.

El deporte conéctanos con nuesa mesma fuerza, coles nueses capacidaes, col nuesu poder. Si facer colectivu, asocede la maxa, y consiguimos avanzar xuntes escontra ser les dueñes de les nueses vides. Toes estes coses qu’a muncha xente LGTBI+ fuéronnos quitando, o quieren quitanos.

El deporte danos fuerza, flexibilidá, elasticidá, trabayu n’equipu. Tenemos derechu a tener fuerza pa soportar el nuesu pesu y el pesu de la vida, a ser flexibles y elástiques, física y mentalmente, tenemos derechu a la salú, a ocupanos de nós mesmes y… ¿Qué pue haber más sanu que practicar deporte con xente maya, y cola compañía de les redolaes incomparables que tenemos en Asturies?

Amás, el deporte n’equipu amplía los nuesos horizontes sociales, ayúdanos a conectar más con otres persones. Toos estos y otros munchos valores del deporte, son valores del mundu queer, del mundu LGTBI, de les lluches transmarikabibollo.

Nesti mundu de ritmos rotos, nesti mundu onde cuesta saber lo que merez la pena, onde dacuando se nos escaecen les coses importantes de la vida, una forma de tar sanes ye tar en contactu cola naturaleza. Conectar con ella, aprender d’ella y aprender a respetala, valorala y maraviase con ella. Esto ye faer un mundu meyor, un planeta meyor, y dir en favor de la vida n’este, el nuesu llar colectivu.

Cuando vas un domingu al monte y dediques a conocer y les plantes, los sos nomes, a conocer la naturaleza que t’arrodia, la más próxima, y dedíques-y tiempu a ella, tas curiar y te tas curiando. Y bonu, lo más importante, tamos pasar bien muncha más xente. Porque eso ye lo principal, que cada vez qu’axuntamos, ye una fiesta: tocamos el visu y sincronizamos los nuesos llatíos aceleraos.

Por eso dende Faciendo Camín queremos animar a toles persones a que ruempan los tabúes, los silencios, les opresiones y xúntense y muévanse y báillense y bésense y quiéranse nel ríu, nel monte, na sienda y na braña.

SÍGUINOS N'INSTAGRAM

This error message is only visible to WordPress admins
Error: There is no connected account for the user faciendocamin.

CONTACTA CON NÓS

info@faciendocamin.org

Escuelina Rural de Podes
33418, Gozón (Asturies)

Col sofitu de: